കൊട്ടാരം ജോത്സ്യന് ഗ്രഹപ്പിഴ

0
43
thennali-raman-stories-malayalam

ബീജപ്പൂർ സുൽത്താന്റെ ഏറ്റവും വലിയ ശത്രുവായിരുന്നു കിഷ്‌ണദേവരായർ . കൃഷ്ണദേവരായരെ എങ്ങനെയെങ്കിലും വകവരുത്തണം എന്നൊരു വാശിയായിരുന്നു സുൽത്താന്. കാരണമുണ്ട് താനും. കൃഷ്ണദേവരായർ ജീവിച്ചിരുന്നാൽ ബീജപ്പൂർ രാജ്യം ഇല്ലാതാകും. കൃഷ്ണദേവരായരെ വകവരുത്താനായി സുൽത്താൻ നടത്തിയ ശ്രമങ്ങളെല്ലാം പരാജയത്തിൽ കലാശിച്ചു.

കൊട്ടാരം ജോത്സ്യൻ  സ്വാർത്ഥമതിയും ധനമോഹിയും ചതിയനുമായിരുന്നു. ഒരു ദിവസം സുൽത്താന്റെ ചാരൻ ജോത്സ്യനെ സമീപിച്ചു. വലിയൊരു തുക ജ്യോത്സ്യന് കൈക്കൂലിയായി നൽകി. അനന്തരം ജോത്സ്യനുമായി ഒരു കരാറുണ്ടാക്കി. ഇതായിരുന്നു കരാർ.

ചക്രവർത്തി നടപ്പാക്കാനിരിക്കുന്ന ആക്രമണപദ്ധതി എങ്ങനെയെങ്കിലും തടയണം. ജോത്സ്യരുടെ  അഭിപ്രായം അറിഞ്ഞിട്ടേ ചക്രവർത്തി യുദ്ധസമയം നിശ്ചയിക്കു. അപ്പോൾ തെറ്റായ വിവരങ്ങൾ നൽകി ചക്രവർത്തിയെ കുറഞ്ഞത് ഒരു വർഷത്തേക്കെങ്കിലും ആക്രമണത്തിൽ നിന്നും പിന്തിരിപ്പിക്കണം. ആക്രമണത്തിന് തുനിഞ്ഞാൽ മരണമായിരിക്കും ഫലമെന്ന് ചക്രവർത്തിയോട് പറയണം. കൈക്കൂലി പറ്റിയ ജോത്സ്യൻ ചാരൻ പറഞ്ഞതുപോലെ ചെയ്യാമെന്നേറ്റു.

അടുത്ത ദിവസം ജോത്സ്യൻ ചക്രവർത്തിയെ കണ്ടു.

‘തിരുമനസ്സേ, ഗ്രഹനില വളരെ മോശമായി കാണുന്നു. യാതൊരു കാരണവശാലും അവിടുന്ന് രാജ്യം വിട്ടിറങ്ങരുത്. അടിയൻ ഒരു കാര്യം പറഞ്ഞാൽ കോപിക്കരുത്. ഒരു വർഷത്തേക്ക് അങ്ങ് ആക്രമണത്തിന് പുറപ്പെടരുത്. പുറപ്പെട്ടാൽ മൃത്യുവായിരിക്കും ഫലം എന്നാണ് ഗ്രഹങ്ങൾ പറയുന്നത്’

ജോത്സ്യന്റെ പ്രവചനങ്ങൾ ചക്രവർത്തിയെ ഞടുക്കി. എങ്കിലും ആക്രമണ പദ്ധതി ഉപേക്ഷിക്കുവാൻ അദ്ദേഹം തയ്യാറല്ലായിരുന്നു.

‘ജോത്സ്യരെ നിങ്ങളുടെ കണക്കുകൂട്ടലുകളിൽ തെറ്റുണ്ടെന്നാണ് എന്റെ ഉത്തമ വിശ്വാസം. ഞാൻ ആക്രമണത്തിനുള്ള എല്ലാ സജ്ജീകരണങ്ങളും പൂർത്തിയാക്കിയിരുന്നു. ആരെതിർത്താലും നിശ്ചയിക്കപ്പെട്ട ദിവസം തന്നെ പട നീങ്ങുന്നതായിരിക്കും’

ചക്രവർത്തിയുടെ അഭിപ്രായം കേട്ട് സദസ്സിലുള്ളവർ ഞെട്ടിപ്പോയി. ഗ്രഹങ്ങളെ ധിക്കരിച്ചു ഇറങ്ങിത്തിരിക്കുക ശരിയല്ല. മുതിർന്നവർ ചക്രവർത്തിയെ ആ സംരംഭത്തിൽ നിന്ന് പിന്തിരിപ്പിക്കാനുള്ള ശ്രമമായി.

ചക്രവർത്തി ആകെ ചിന്താകുഴപ്പത്തിലായി. മനസ്സുപറയുന്നത് ഇറങ്ങിത്തിരിച്ചോളാനാണ്. പക്ഷേ മുതിർന്നവരൊക്കെ കൊട്ടാരം ജോൽസ്യനെ ധിക്കരിക്കരുതെന്ന അഭിപ്രായക്കാരുമാണ്.

അവസാനം ചക്രവർത്തി രാമനെ വിളിപ്പിച്ചു.

‘രാമാ, ജോത്സ്യന്റെ പ്രവചനത്തെക്കുറിച്ചു നീ കേട്ടുകാണുമല്ലോ. പക്ഷേ എനിക്കതിൽ അശ്ശേഷം വിശ്വാസമില്ല. ജോൽസ്യന്റെ പ്രവചനങ്ങൾ വിശ്വാസനീയമല്ലെന്ന് നീ എങ്ങനെയെങ്കിലും തെളിയിക്കണം. അങ്ങനെയെങ്കിൽ നിനക്ക് ഞാൻ വലിയ ഒരു തുക സമ്മാനമായി നൽകാം’

‘തിരുമനസ്സേ, അക്കാര്യം ഞാനേറ്റു. പക്ഷേ ആ ശ്രമത്തിൽ ജോത്സ്യന് വല്ല ശിക്ഷയും ഞാൻ കൊടുത്താൽ എന്നോട് കോപിക്കരുത്, ആ ശിക്ഷ എത്ര കൂടിയാൽ പോലും’ രാമൻ പറഞ്ഞു.

ചക്രവർത്തിക്ക് എന്തിനും സമ്മതമായിരുന്നു.

ജോൽസ്യനെ കൊട്ടാരത്തിലേക്ക് വിളിപ്പിക്കണമെന്ന് രാമൻ ചക്രവർത്തിയോട് പറഞ്ഞു. അതനുസരിച്ചു ജോത്സ്യൻ കൊട്ടാരത്തിലെത്തി. രാമൻ ജോത്സ്യനുമായി സംഭാഷണം തുടങ്ങി.

‘ജോത്സ്യരെ, നിങ്ങളുടെ പ്രവചനങ്ങൾ എല്ലാം ഫലിക്കാറുണ്ടോ?’

‘തീർച്ചയായും. ഇതുവരെ ഞാൻ നടത്തിയിട്ടുള്ള പ്രവചനങ്ങൾ എല്ലാം തന്നെ സത്യമായി ഭവിച്ചിട്ടുണ്ട്. ഗ്രഹനില കാണിക്കുന്നതുപോലെയല്ലേ ഞാൻ പറയുന്നത്? ഗ്രഹങ്ങൾക്ക് ഒരിക്കലും തെറ്റാറില്ലല്ലോ?’ ജോത്സ്യൻ പറഞ്ഞു.

‘അങ്ങനെയോ? ഒരു പക്ഷേ നിങ്ങളുടെ പ്രവചനം തെറ്റിയെന്നിരിക്കട്ടെ അപ്പോൾ നിങ്ങളെന്ത് ചെയ്യും?’

‘എന്റെ പ്രവചനങ്ങൾ തെറ്റാണെന്നു തെളിയിച്ചാൽ ഞാനവർക്ക് എന്റെ ജീവൻ തന്നെ നൽകാം. സംശയമേ’ എന്നായി ജോത്സ്യൻ.

‘ആട്ടെ, ജോത്സ്യരെ നിങ്ങൾക്ക് എത്ര വയസുണ്ട്’

‘എനിക്ക് നാല്പത്തി മൂന്നു വയസായി.’

‘ശരി. ജോത്സ്യരുടെ ഭാവിഫലം എന്താണെന്നു വെളിപ്പെടുത്താമോ?’ രാമൻ ചോദിച്ചു

‘തീർച്ചയായും’

‘എപ്പോഴായിരിക്കും ജോത്സ്യരുടെ മരണം?’

‘എനിക്ക് എഴുപത്തി ഏഴ് വയസ്സുവരെ ആയുസുണ്ട്. അത് ഞാൻ ഗണിച്ചു വച്ചിരിക്കുകയാണ്’

അതായത് ജോത്സ്യൻ ഇനിയെത്ര നാൾ കൂടി ജീവിക്കുമെന്നാണ്?’

‘കൃത്യമായി പറഞ്ഞാൽ മുപ്പത്തിനാല് വർഷം കഴിഞ്ഞു മാത്രമേ എനിക്ക് മരണമുള്ളൂ’

‘അതിനിടക്ക് ജോത്സ്യൻ മരിക്കില്ലെന്നു തീർച്ചയാണോ?’

‘തീർച്ച നൂറുശതമാനം തീർച്ച’

പിന്നെ എല്ലാം ഞൊടിയിടക്കുള്ളിൽ കഴിഞ്ഞു. രാമൻ ഉറയിൽ നിന്ന് വാൾ വലിച്ചൂരി ജോത്സ്യരെ വെട്ടി. ജോത്സ്യരുടെ ശിരസ്സ് ശരീരത്തിൽ നിന്ന് വേറിട്ടു.

എല്ലാവരും അന്ധാളിച്ചു. രാമനാകട്ടെ യാതൊരു ഭാവഭേദവുമില്ലാതെ പറഞ്ഞു.

‘തിരുമേനി, ഇയാളുടെ പ്രവചനം തെറ്റാണെന്നു ഞാനിതാ തെളിയിച്ചിരിക്കുന്നു. ഇനി അങ്ങേയ്ക്കു ധൈര്യമായി യുദ്ധത്തിന് പുറപ്പെടാമല്ലോ?’

ചക്രവർത്തിക്ക് സമ്മതിക്കാതെ നിർവ്വാഹമില്ലായിരുന്നു. കൂടാതെ ചക്രവർത്തിക്ക് വേറൊരു സംശയം ഉണ്ടായിരുന്നു. ജ്യോത്സ്യന് വല്ല ശത്രുരാജ്യങ്ങളുമായി ഗൂഢബന്ധമുണ്ടോ? ഇയാൾ രാജ്യദ്രോഹം ചെയ്തിരിക്കുന്നുവോ? ഉടൻ ഏതാനും ഭടന്മാരെ ജോത്സ്യന്റെ ഭവനത്തിലേക്കയച്ചു. ജോത്സ്യനും ശത്രുരാജ്യവും തമ്മിൽ നടത്തിയ കത്തുകൾ ഭടന്മാർക്ക് അവിടെ നിന്ന് ലഭിച്ചു. ചക്രവർത്തിക്കെല്ലാം മനസിലായി. ശത്രു ചാരന്മാരിൽ നിന്നും പണം വാങ്ങി ജോത്സ്യൻ തന്നെ വഞ്ചിക്കുകയായിരുന്നു. ഏതായാലും രാമൻ അയാൾക്ക് തക്കശിക്ഷ തന്നെ കൊടുത്തു. ചക്രവർത്തി രാമനെ അഭിനന്ദിച്ചു. ധാരാളം സ്വർണനാണയങ്ങൾ രാമന് പാരിതോഷികമായി നൽകി. രാമൻറെ ബുദ്ധിവൈഭവം ഒന്ന് കൊണ്ട് മാത്രമാണ് സത്യം പുറത്തു വന്നത്.

നിശ്ചയിക്കപ്പെട്ട ദിവസം തന്നെ ചക്രവർത്തി പടനീക്കി. വിജയനഗരസൈന്യം വിജയക്കൊടി പാറിച്ചു. പല രാജ്യങ്ങളും കീഴടക്കി.

‘എന്റെ വിജയത്തിന് കാരണം രാമൻ തന്നെ’ വിജയശ്രീലാളിതനായി തിരിച്ചെത്തിയ ചക്രവർത്തി പറഞ്ഞു.

ഒരു മറുപടി വിട്ടേക്കുക

ദയവായി നിങ്ങളുടെ അഭിപ്രായം രേഖപ്പെടുത്തുക!
ദയവായി ഇവിടെ നിങ്ങളുടെ പേര് നൽകുക